ਫਿਰੌਤੀ ਲਈ ਝੂਠੀਆਂ ਕਾਲਾਂ ਅਤੇ ਆਪਣੇ ’ਤੇ ਫੇਕ ਹਮਲਾ ਕਰਵਾ ਕੇ ਫੇਮ ਤੇ ਗੰਨਮੈਨ ਲੈਣ ਦੀ ਯੋਜਨਾ ਬਣਾਉਂਦਾ ਭੱਠਾ ਮਾਲਕ ਸਾਥੀਆਂ ਸਮੇਤ ਪੁਲਸ ਦੇ ਅੜਿੱਕੇ ਆਇਆ

ਜਗਸੀਰ ਸਿੰਘ ਸੰਧੂ
ਬਰਨਾਲਾ , 8 ਮਾਰਚ
ਫਿਰੌਤੀ ਲੈਣ ਦੀਆਂ ਝੂਠੀਆਂ ਕਾਲਾਂ ਕਰਵਾਕੇ ਸੁਰੱਖਿਆ (ਗੰਨਮੈਨ) ਲੈਣ ਦੀ ਯੋਜਨਾ ਬਣਾ ਰਹੇ ਭੱਠਾ ਮਾਲਕ ਨੂੰ ਬਰਨਾਲਾ ਪੁਲਸ ਨੇ ਪਹਿਲਾਂ ਹੀ ਦਬੋਚ ਲਿਆ। ਐੱਸ.ਐੱਸ.ਪੀ ਬਰਨਾਲਾ ਸਰਫਰਾਜ਼ ਆਲਮ ਨੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਅਜੀਬੋ ਗਰੀਬ ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ 6 ਮਾਰਚ 2026 ਨੂੰ ਬਰਨਾਲਾ ਪੁਲਸ ਨੂੰ ਇੱਕ ਇਤਲਾਹ ਮਿਲੀ ਕਿ ਬਰਨਾਲਾ ਦੇ ਇੱਕ ਭੱਠਾ ਮਾਲਕ ਸਿਵਮ ਮਿੱਤਲ ਨੂੰ ਇੱਕ ਗਰੋਹ ਕਾਲਾਂ ਕਰਕੇ 20 ਲੱਖ ਰੁਪਏ ਦੀ ਫਿਰੌਤੀ ਮੰਗ ਰਿਹਾ ਹੈ ਤਾਂ ਪੁਲਸ ਨੇ ਇਸ ਮਾਮਲੇ ਦੀ ਟੈਕਨੀਕਲ ਢੰਗ ਅਤੇ ਆਪਣੇ ਸੋਰਸਾਂ ਰਾਹੀਂ ਜਾਂਚ ਸੁਰੂ ਕਰ ਦਿੱਤੀ। ਜਿਲ੍ਹਾ ਪੁਲਸ ਮੁਖੀ ਸਰਫਰਾਜ ਆਲਮ ਨੇ ਦੱਸਿਆ ਕਿ ਐੱਸ.ਪੀ ਅਸ਼ੋਕ ਕੁਮਾਰ ਅਤੇ ਡੀ.ਐੱਸ.ਪੀ ਡੀ ਰਾਜਿੰਦਰਪਾਲ ਸਿੰਘ ਦੀ ਅਗਵਾਈ ਵਿੱਚ ਸੀ.ਆਈ.ਏ ਇੰਚਾਰਜ ਇੰਸਪੈਕਟਰ ਬਲਜੀਤ ਸਿੰਘ ਅਤੇ ਸਬ ਇੰਸਪੈਕਟਰ ਦਲਜੀਤ ਸਿੰਘ ਵੱਲੋਂ ਕੀਤੀ ਗਈ ਪੜਤਾਲ ਵਿੱਚ ਨਿਕਲਿਆ ਕਿ ਭੱਠਾ ਮਾਲਕ ਸ਼ਿਵਮ ਮਿੱਤਲ ਨੇ ਫੇਮ ਪਾਉਣ ਲਈ ਅਤੇ ਇਸ ਬਹਾਨੇ ਸੁਰੱਖਿਆ (ਗੰਨਮੈਨ) ਹਾਸਲ ਕਰਨ ਲਈ ਖੁਦ ਹੀ ਇਹ ਸਾਰਾ ਤਾਣਾਬਾਣ ਬੁਣਿਆ ਹੈ।

ਜਿਲ੍ਹਾ ਪੁਲਸ ਮੁੱਖੀ ਨੇ ਦੱਸਿਆ ਕਿ ਸ਼ਿਵਮ ਮਿੱਤਲ ਉਰਫ ਨਵੀ ਪੁੱਤਰ ਹਰਮੇਸ਼ ਕੁਮਾਰ ਵਾਸੀ ਗਲੀ ਨੰਬਰ 6-ਬੀ ਰਾਮਬਾਗ ਰੋਡ ਜਿਸ ਦਾ ਠੀਕਰੀਵਾਲਾ ਰੋਡ ’ਤੇ ਇੱਟਾਂ ਦਾ ਭੱਠਾ ਹੈ, ਉਸ ਨੇ ਫੇਮ ਪਾਉਣ ਅਤੇ ਸੁਰੱਖਿਆ (ਗੰਨਮੈਨ) ਲੈਣ ਲਈ ਆਪਣੇ ਡਰਾਇਵਰ ਪਰਮਜੀਤ ਸਿੰਘ ਪੰਮਾ ਪੁੱਤਰ ਦਰਸ਼ਨ ਸਿੰਘ ਵਾਸੀ ਪੱਤੀ ਰੋਡ ਬਰਨਾਲਾ, ਭੱਠਾ ’ਤੇ ਕੰਮ ਕਰਦੇ ਮੁਲਾਜ਼ਮ ਗੁਰਪ੍ਰੀਤ ਸਿੰਘ ਗੋਪੀ ਵਾਸੀ ਕਾਂਗੜ ਪੱਤੀ ਭਾਈਰੂਪਾ ਹਾਲ ਆਬਾਦ ਗਲੀ ਨੰਬਰ 5 ਪੱਤੀ ਰੋਡ ਬਰਨਾਲਾ ਰਾਹੀਂ ਉਸ ਦੇ ਦੋ ਦੋਸਤਾਂ ਕੁਲਵੰਤ ਰਾਏ ਉਰਫ ਵਿੱਕੀ ਪੰਡਤ ਵਾਸੀ ਕਾਂਗੜ ਪੱਤੀ ਭਾਈ ਰੂਪਾ ਅਤੇ ਕਮਲਪ੍ਰੀਤ ਸਿੰਘ ਉਰਫ ਬੱਬੂ ਵਾਸੀ ਕਾਂਗੜ ਪੱਤੀ ਭਾਈ ਰੂਪਾ ਤੋਂ ਫਿਰੌਤੀ ਮੰਗਣ ਦੀਆਂ ਝੂਠੀਆਂ ਕਾਲਾਂ ਕਰਵਾਈਆਂ ਅਤੇ ਇਸ ਮਾਮਲੇ ਨੂੰ ਹੋਰ ਪੁੱਖਤਾ ਦਿਖਾਉਣ ਲਈ ਇਹਨਾਂ ਨੇ ਸਾਰਿਆਂ ਨੇ ਗਿਣੀਮਿੱਥੀ ਯੋਜਨਾ ਤਹਿਤ 7 ਮਾਰਚ 2026 ਨੂੰ ਠੀਕਰਵਾਲਾ ਰੋਡ ’ਤੇ ਭੱਠੇ ਦੇ ਨਜਦੀਕ ਸ਼ਿਵਮ ਮਿੱਤਲ ਉਪਰ ਫਾਇਰਿੰਗ ਕਰਕੇ ਦਹਿਸਤ ਦਾ ਮਾਹੌਲ ਬਣਾਉੁਣ ਦਾ ਪ੍ਰੋਗਰਾਮ ਬਣਾਇਆ ਸੀ, ਤਾਂ ਕਿ ਸ਼ਿਵਮ ਮਿੱਤਲ ਪੁਲਸ ਕੋਲੋਂ ਸੁਰੱਖਿਆ ਦੀ ਮੰਗ ਕਰ ਸਕੇ, ਪਰ ਪੁਲਸ ਨੇ ਇਹਨਾਂ ਨੂੰ ਆਪਣੇ ਮਨਸੂਬੇ ਪੂਰੇ ਕਰਨ ਤੋਂ ਪਹਿਲਾਂ ਹੀ ਬਰਨਾਲਾ-ਠੀਕਰੀਵਾਲਾ ਰੋਡ ਤੋਂ ਪਿੰਡ ਸੰਘੇੜਾ ਵੱਲ ਜਾਂਦੀ ਸੜਕ ’ਤੇ ਇਨੋਵਾ ਗੱਡੀ ਨੰਬਰ ਪੀ.ਬੀ 19 ਐੱਸ 3232 ਵਿੱਚੋਂ ਗ੍ਰਿਫਤਾਰ ਕਰ ਲਿਆ ਅਤੇ ਇਹਨਾਂ ਕੋਲੋਂ 2 ਜਿੰਦਾ ਕਾਰਤੂਸਾਂ ਸਮੇਤ 315 ਦਾ ਇੱਕ ਪਿਸਤੌਲ ਵੀ ਬਰਾਮਦ ਕੀਤਾ ਹੈ। ਪੁਲਸ ਨੇ ਇਹਨਾਂ ਨੂੰ ਗ੍ਰਿਫਤਾਰ ਕਰਕੇ ਸਿਵਮ ਮਿੱਤਲ, ਪਰਮਜੀਤ ਸਿੰਘ ਪੰਮਾ, ਗੁਰਪ੍ਰੀਤ ਸਿੰਘ ਗੋਪੀ, ਕੁਲਵੰਤ ਰਾਏ ਉਰਫ ਵਿੱਕੀ ਪੰਡਤ ਅਤੇ ਕਮਲਪ੍ਰੀਤ ਸਿੰਘ ਬੱਬੂ ਦੇ ਬਰ ਖਿਲਾਫ ਐਫ.ਆਈ.ਆਰ ਨੰਬਰ 100, ਮਿਤੀ 7 ਮਾਰਚ 2026, ਧਾਰਾ 217, 61 (2) ਬੀ.ਐਨ.ਐਸ 25/54/59 ਆਰਮਜ਼ ਐਕਟ ਤਹਿਤ ਮੁਕੱਦਮਾ ਦਰਜ ਕੀਤਾ ਹੈ।